Auszüge aus dem
Rebsordegedischd

Die Rebsorde, Ihr liewe Leit,
wu kummen die all her?
Die kann mer ned all kenne heit;
's werrn immer als noch mehr.

Do driwwer was ze reime wolle
is faschd garned ze mache.
Doch gibd es werglisch jo so Dolle,
wu dischden solsche Sache.

Drum gibd's aa jedzd e schää Gedischd
nur iwwer Woi un Rewe;
es lossd in objekdiver Sischd
die Woisorde hochlewe!

De Riesling, als e aldi Sord
is iwwerall bekannd.
Mer dringd'n faschd an jeden Ord,
un ned nur uff'm Land.

"Kehnisch vum Weißwoi" nennd man aa
un manschmol Männerwoi.
Doch aa viel Fraue – muss mer saa –
finnen de Riesling foi.
.....

De Müller-Thurgau, des is so,
der hängd immer schää voll.
Vun Säure is ned zu viel do;
fer viele is des doll.
.....
Als druggne Woi schmeggt der reschd gud.
Midunner waaß des kããner,
dass er dann annerschd haaße dud.
Do haaßd er dann Rivaner.

Scheurebe – 's is velleischd bekannd
un manschem aa ned nei –
die is noh Georg Scheu bennand,
e Zischdung aus Alzey.
.....

Morio-Muskat schdamd aus de Palz,
exodisch klingd soin Name.
Der laafd bugeddreisch dorsch de Hals,
faschd wie Parfiem vun Dame.
.....

Gewürztraminer, mer glaabd es kaum,
soi Hängel, die sin klãã.
die Pergel, die sin redlisch-braun.
So hängen se als drãã.
.....
Es is drodzdem en prima Woi,
bugeddreisch, viel Aroma.
Werd ned nur gschädzd – so soll's aa soi –
vum Enkel un de Oma.

Neutrale Woischer, die gibd's aa
un zwar ned nur ããner.
Uff jeden Fall, des muss mer saa,
dezu g'herd de Sylvaner.
.....
Es is e aldbekandi Art.
Faschd jeder dud en kenne.
Als Esstraub schmeggt se reschd apart,
wie se im Wingert hänge.

De Chardonnay gibd's iwwerall
im Woibau uff de Erd,
drum wird er aa vun Fall zu Fall
als Nummer 1 geehrd.

Vun kããner annre Sord gibd's mehr
uff unserm Globus do.
Fer'n Chardonnay is des e Ehr.
Warum? Es is hald so.
.....

Grauer Burgunder is ofd wuchdisch.
Es is en gude Woi!
Midunner is er aa reschd fruchdisch.
Warum soll's ned so soi?

In Frãnkreisch haaßd er Pino gri
Jawohl, die hamm den aa.
Un fahrschde no Italien hie,
Pino gritscho dud mer saa.

De Grauburgunder haaßd aa noch
Ruländer, hier un dord.
Un des is – ei, des glaabschde doch –
aa werglisch die gleich Sord!

De Portugieser, des is wohr,
is ned aus Portugal.
Seit uhgfähr 150 Johr
hamm mir den iwwerall.
.....
Den gibd's als rod oder rosť
un aa noch als Weißherbschd.
Den dringschde ohne Ach un Weh
so lang, bis de hald schderbschd.

De Dornfelder, der is schun lang
als Rodwoi ganz weid obbe.
's is fer die Fraa un aa fer'n Mann
en gude rode Drobbe.

Soi dunkli Farb, die is schun heffdisch,
des muss mer werglisch saa.
Un im Geschmagg, do is er kräfdisch.
En Rodwoi – wunderbar!


.....

En gude, schääne Spätburgunder,
rubinrod in de Farwe,
der machd disch lusdisch un aa munder.
Des kann'schde werglisch glawe.
.....

Soweid zum Woi un zu de Rewe.
Nadierlisch gibd's noch mehr.
Vollschdändischkeid – so isses ewe –
dofor gibt's kãã Gewähr.

Die Vielfald vun de viele Sorde,
die kann mer kaum beschreiwe.
Un des is gud. Mit annre Worde:
So soll es jo aa bleiwe!

Home ∑ zurück
zum Vorwort von Gunter Heiland
zum Prolog
zum Inhaltsverzeichnis
zum Glossar