De Zauberlehrbu

De Hexemããschder, ja, der alde
is jedzd grad mol ford.
Soin Zauber du' jedzd isch vewalde.
Geister, herd uff moi Word!
Soi Tate un soi Schbrisch,
isch glaab, des kann isch aa.
Die Wunner mach jedzd isch!
Gemachd werd, was isch saa!

Schwabbel, schwabbel,
isch will sehe,
dass desweje
Wasser fließd
un aa ohne dumm Gebabbel
in e Badwann sich dann gießd.

Aller, kumm, du alder Bese',
nemm die alde Lumbehille!
Bischd schunn immer Kneschd gewese,
schaff emol grad no moim Wille.
Uff zwaa Bãã du' schdehe,
owwe is en Kobb
un du duschd jedzd gehe
mimm Ããmer - aller hopp!

Schwabbel, schwabbel,
isch will sehe,
dass desweje
Wasser fließd
un aa ohne dumm Gebabbel
in e Badwann sich dann gießd.

Gugg, der laafd zum Ufer nunner;
ei, der is jo schunn am Fluss.
Schnell wie'n Blidz, ja, was e Wunner,
kummd er soford zum erschde Guss.
Un jedzd glei zum zwadde,
die Wann werd langsam voll,
brauchschd ned lang ze wade.
Des is ããfach doll!

Bleib jedzd schdehe,
alder Bese'!
Gud gewese!
Hald un schdobb!
Och, isch hab jo - wehe, wehe -
des Zauberword ned mehr im Kobb!

Des Word, mid dem er endlisch widder
werd, was er als friher war.
Immer mehr Wasser jedzd schidd er!
Ei, was soll isch do noch saa?
Laufend hold er Wasser!
Der herd ned mehr uff!
's werd alles nass un nasser.
Am End gehd alles druff!

Nã, nã, so ned!
Kann ned klabbe!
Will en schnabbe,
bin nervees
un moi Angschd, die gehd ned weg!
Ouwouwou, was guggd der bees!

Ouh, du Deiwel, ja, du Debb,
ball is alles jo vesoffe!
Gugg mol, iwwer jedie Trebb
kummd en Wasserfall geloffe.
En vedammde Bese',
der ned here will!
Schdogg, was du gewese,
schdeh doch widder schdill!

Loss doin Schdolz,
du' des losse!
Mach kãã Bosse!
Will dich halde
un dann endlisch des ald Holz
mimme scharfe Beilsche schbalde.

Der kummd schunn widder ããgediesd.
Un isch du' misch uff disch schmeise.
Glei, du Bankert, ja, du Biesd,
bischde hie vum scharfe Eise!
Sauber, schää getroffe,
ausenanner is er jedzd!
Ja, des lossd misch hoffe!
Lang genuch geschwidzd!

Oh weh, oh weh!
Zum Veregge!
Jedzd zwaa Schdegge
schdehn als Kneschde
fix un ferdisch in de Heh.
Helfd mer doch, Ihr hohe Mäschde!

Un die rennen! Nas un nasser
werd's jo grad jedzd iwwerall.
Do, gugg hie, ouh, so viel Wasser!
Scheff un Mããschder, kumm doch ball!
Ach, do dud er kumme!
Scheff, die Nod is groß!
Die Geister, do, die dumme,
werr ããfach isch ned los!

"In die Egg noi!
Besen, kumm!
's is jedzd rum!
Seid vesehnlisch!
Dann es rufd, so soll's aa soi,
die Geister nur als isch persenlisch."

 

* * *

Home · zurück

 

* * *